نصائح للبنوتات المخطوبين او الل لسه هيتخطبوا

ف البدايه كده ربنا يستر عليا منكم وان كيدكن لعظيم

يالا بينا
آنستي العزيزة.. لو ربنا فك عقدتك.. واتخطبتي..
فإليك نصائحي حتى تأخذي بخطيبك من مركب الخطوبة
إلي محدش عارف هاترسى ع إيه..
إلى مثوااااه الأخير في قفص النسانيس..
قصدي قفص الزوجية السعيد

أجمل ما في الخطوبة العزومات الرومانسية..
على أحلى محلات أكل ف البلد..
والل عمرك مانتي شايفاها بعد الجواز..
المهم نصائحي لك عند أي عزومة مع ختيبك.. قلنا رقَّه ....
1- الأول لازم تعرفي إن الشوكة والسكينة بيتمسكوا من إيديهم
من الطرف يعني مش من الوسط ولا من البوز
زي الخنجر ولا من فوق طبعًاااااااااا

2- العيش أوع تفضحينا وتقطعيه بسنانك..
ولا الرغيف نصين بأيدك وكل نص لقمة وتحشري.. أوع..
العيش بيتقطع بالسكينة ف الطبق..
وبعدين تاخدي لقمة.. لقمة.. بالعافية..
قال يعني نفسك مسدودة.. اضغطي على أعصابك جدااا
وبعدين لما تروَّحي.. إبقي حِفِّي زي مانتِ عايزه....

3- الشوووربة.. أبوس كعب رجلك.. بند الشوربة ده مهم جدًاااا..
الشوربة تتشرب من غير صوت خالص..
ومن غير ماتقعدي تنفخي فيها.. زي القهوجي الل بينفخ ف الحجر للزبون..
وطبعًاااااا عايزك تنسى تمامًا.. السلطانية اللي بتقيميها على بقك ف البيت..
وتدلدقي على روحك..
بالمعلقه وبدون صوت.. سخنة ولعة برضه بدون صوت..
وتسيبي تلت الطبق ع الأقل.. مش تميليه.. عشان تلهطيها لآخر نقطة.....

4- الرز طبعاً .. بيتاكل بالشوكة.. أوع إيدك تتمد ع المعلقة..
وتغرفي من طبق الرز وتعبي.. إوع..
الرز بالشوكة.. وكأنك بتبوسيه مش بتاكليه..

5- المكرونة.. الاسباكتي.. برضه بالشوكة..
تتلف على طرف الشوكة.. لحد ما تخلص وبعدين تحطيها ف بؤك من سكات..
مش تشفطي المكرونة عود عود..

6- السمك.. مشكلة.. شوفي.. بتفصلي اللحم عن الشوك..
إزاي..؟؟ تقطعي اللحم من النص.. بالطول وبعدين تفردي اللحم ع الجانبين
ولما تخلصي ناحية.. متقلبيش السمكة..
بلاش فلح.. شيلي السلسلة بالشوكة والسكينة
وحطيها ف جنب الطبق وكملي أكل النص التاني..
وبدل الفيلم الهندي ده.. نصيحة.. ماتكليش السمك خالص..
قولي مابحبش السمك وخلصي نفسك..

7- الجمبري.. -إذا كنتي عارفاه-.. أول ماطبق الجمبري ينزل..
بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت ببااااا..
وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة..
أنا ف عرضك إنسي المصمصة دلوقت..

8- البطاطس سواء مسلوقة أو محمرة.. أوعي تهرسيها وتدبيها ع الرز وتدي ...لا..لآ...لآ...
بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..

9- الفاكهة.. لو الفاكهة فيها بذر.. طلعيه من بؤك بالراحة
وحطيه ف إيدك وهي مقفولة..
وبعدين ف طفاية السجاير اللي ع الترابيزه..
اوع ياحبيبتي من نظام التفتفة للبذر.. إنسي....

10- لما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-..
وتقولي له مش ممكن.. أنا عمري ما اتفجعت كدة..
أنا أودامي أسبوع.. هابطل أكل فيه.....

وبعدين تمسكي الفوطة اللي دايمًا موجودة ع التربيزة من غير لازمة..
وتبوسيها.. آل يعني بتمسحي بؤك..
وبعدين تستأذني منه لدخول التوليت لإصلاح ماكياجك..
وتخشي التواليت وتطلعي من شنطة إيديك..
لفة الفول والطعمية اللي جايباها معاكي.. وبالهنا والشفاااااااااااا
وف النهايه يا حلووووووين شفت اد ايه عايز مصلحتكم وبتمنالكم السعاده
اضحكوا بق ولو لمره وعذبتونى حرام عليكم
اه من الحق عايز اقول ان عمر ما كان ده اسلوب كل البنوتات ف حياتهم
ودايما هاقول اننا معانا احلى واجمل والذ بنوتات ف الدنيا