انا عايز اتعلم السرقة والذى منة

السلام عليكم و رحمة الله و بركاته

كيفكم و ايه الاخبار

يا رب دايما بخير

فى موضوع انا عايز افتحه معاكم و نناقشه بس انا مش عارف اشرحه فحسب الشرح دة للقصة و المعلومة حتوصل


فى قصة احادثها حصلت فى قسم الشرطة بين مواطن عادى و المأمور او الظابط اللى كان ماسك القسم ساعتها

تعالوا نشوف القصة و بعدين حتفهموا انا عايز اشرح ايه

تبدأ القصة بأن المواطن دخل و بدأ يكلمالظابط اللى جوة







لو سمحت يا باشا انا عايز اتعلم السرقة


انتا مجنون ؟

قول اللى تقوله بس لو سمحت دلنى على كوماندة الحرامية عشان يعملنى السرقة

انتا باين عليك مش حتجيبها لبر تحب الحبسك مع المجرمين اللى متلقحين فى التخشيبة

يا باشا انا قلت انكم ادرى الناس بالحرامية مجرد استفسار يعنى

و انتا بقى ناوى تبقى حرامى و تشرف عندنا

لا يا باشا انتا فهمتنى غلط

طيب فهمنى صح يا روح امك

طب ليه الام يا باشا

انتا حتصاحبنى انجز و قول اللى عندك

اقول لسيادتك اصل انا بقى دى رابع مرة تتسرق فيها شقتى

تقوم تتعلم بقى انتا السرقة عشان تسرق المواطنين بدل ما تبلغ عن السرقة

يا باشا مواطنين ايه بس هوا فى مواطن عنده حاجة تتسرق؟ و بعدين انا بلغت كتير اوى قبل كدة بص بصراحة انا مش عايز اشغلكم و ربنا يكون فى عونكم و كفاية اللى انتم فيه انا افهم سيادتك

قول وخلصنى

بص يا باشا انا نفسى اعرف الحرامى ابن الـــ <تيييييييييييييييت> دة بيدخل الضقة ازاى يا باشا غلبت مخلتشى... ترابيس حطيت جنازير ركبت اقفال قفلت غلبت يا باشا

و عايزنى بقى اعمل لاهلك ايه ؟

ولا حاجة يا باشا دلنى انتا بس على الكومندا بتاع الحرامية اصل انا لما اتعلم السرقة حبقى عارف ولاد الـــ <توووووووت> دول بيدخلوا الشقة ازاى و ساعتها بقى حأمن نفسى

انتا باين عليك شارب حاجة يلا لو كل واحد اتسرقت منه حاجة يروح يتعلم السرقة حتبقى البلد كلها حرامية

انتا اللى قلت يا باشا مش انا

قصدك ايه ياااااض

..ولا حاجة

مش بقول لك شارب حاجة شوف يابنى لولا ان شكلك ابن ناس مش وش بهدلة كان حيبقى ليا تصرف تانى معاك بس خلى بالك اتعلم زى ما انتا عايز عشان تأمن نفسك زى ما انتا بتبرطم و تقول انما حتسرق انتا عارف ايه اللى حيحصلك

عارف يا باشا حيحصلى زى الاربعة اللى سرقوا شقتى

قصدك ايه؟

قصدى يا باشا حتمسك و اتبهدل و يطلع بوزى و اترمى فى التخشيبة و اعفن و اتحاكم و الكلام دة كله و مهما هربت حتجاب فى الاخر من .......... افاية استأذن سيادتك بقى عشان الحق الشقة قبل ما الحرامى الخامس يجى


ــــــــــــــــــــــــــــــــــــــــــــــــــ ـــــــــــــــــــــــــــــــــــ

بصوا يا شباب الكلام دة عمليا موجود فى كل حاجة او عشان نبقى دقيقين موجود فى معظم الحاجة مش لازم البيوت و بس بردو الموضوع ينفع للهاكر و الذى منه

يعنى مش كل من يتعلم الهاكر يشتغل بيه و لكن تعلم الهاكر ممكن عشان تخلى بالك منه و تعرف ازاى تحمى نفسك من اذيته

الصراحة القصة دى مش كلها من تأليفى انا بقيتها فى كتاب و انا زودت شوية

بس بردو الفكرة الاساسية تكمن فى جملة واحدة

و هى


علمت الشر لا للشر و لكن لأتقيه

فمن لا يعرف الشر وقع فيه

عندك حق يا عبدة الهاكر بيضر صلحبة قبل ما يضر غيرة
شرفت يا برنس

اية يا عم هيما التسييح دة دة مكنش هاكر دة واحد صاحبى كان بيهزر معايا
واللى اصعب من الهاكر بقى ان انا غيرت الباس ونسيت انا كنت عاملة اية ياة على اليوم دة
وعلى فكرة والله الهاكر دة كلة مش لية اى لازمة